Job 18:5-21

5 ^a“Ddala etabaaza y’omukozi w’ebibi ezikidde,
era n’omuliro gw’ekyoto kye tegukyayaka.
6 Ekitangaala kivudde mu weema ye;
n’ettaala eri ku mabbali ge nayo ezikidde.
7 ^bAmaanyi gamuwedde, ebigere bye tebikyali bya maanyi,
era enkwe ze, ze zimusuula.
8 ^cEky’amazima ebigere bye byamusuula mu kitimba
era n’atangatanga mu butimba.
9 Omutego gumukwata ekisinziiro;
akamasu ne kamunyweeza.
10 Omuguwa gumukwekerwa mu ttaka;
akatego kamulindirira mu kkubo lye.
11 ^dEntiisa emukanga enjuuyi zonna
era n’emugoba kigere ku kigere.
12 ^eEmitawaana gimwesunga;
ekikangabwa kirindiridde okugwa kwe.
13 ^fKirya ebitundu by’olususu lwe;
omubereberye wa walumbe amulyako emikono n’ebigere.
14 ^gAggyibwa mu bukuumi bwa weema ye
era n’atwalibwa eri kabaka w’ebikangabwa.
15 ^hOmuliro gumalirawo ddala byonna eby’omu weema ye;
ekibiriiti kyakira mu kifo mw’abeera.
16 ⁱEmirandira gye gikala wansi,
n’amatabi ge gakala waggulu.
17 ^jEkijjukizo kye kibula ku nsi;
talina linnya mu nsi.
18 ^kAgobebwa okuva mu kitangaala, agenda mu kizikiza
n’aggyibwa mu nsi.
19 ^lTalina mwana wadde omuzzukulu mu bantu be,
newaakubadde ekifo mwabeera.
20 ^mAbantu ab’ebugwanjuba beewuunya ebyamutuukako;
n’ab’ebuvanjuba ne bakwatibwa ekikangabwa.
21 ⁿDdala bw’etyo bw’ebeera ennyumba y’omukozi w’ebibi;
bwe gaba bwe gatyo amaka g’oyo atamanyi Katonda.”